Python's reduce function: what max, min and sum do behind the scenes
Deep Dive with Ahmed, in Arabic: how max, min and sum work behind the scenes, and how reduce generalises them.
This post is in Egyptian Arabic, as I first wrote it on LinkedIn. It follows map and filter.
ده تالت بوست ليا أتكلم عن حاجة أنا بتعلمها: Python reduce function.
اتكلمنا في البوست ده عن الدوال الفخمة وخدنا مثال عليها وهي دالة map، واتكلمنا في البوست ده عن مثال تاني للدوال الفخمة وهي دالة filter. النهارده هنتكلم عن دالة فخمة جديدة وهي دالة reduce.
الـ max و min و sum بتحصل إزاي؟
بص يا سيدي، الموضوع ببساطة إنك لما تحب تجيب الـ max في أي لست، بتروح على دالة max بتناديها وتحط جواها أي لست إنت عاوز تجيب أكبر رقم فيها. وكذلك نفس الكلام مع الـ min والـ sum.
طيب عمرك فكرت الكلام ده بيحصل إزاي في الكواليس؟ أنا جي النهارده أشرحهالك، مش عشان أنا مؤهل أشرحها، لكن عشان لسه متعلمها طازة وعاوز أفضل فاكرها.
خلينا نفترض إن مفيش حاجة موجودة في اللغة بتحسبلك الـ max وإنت مطالب إنك تحسبه، يا ترى هتعمل إيه؟ هتبتكر حل طبعًا.
المعطيات اللي معايا هي إن معايا لست والمطلوب أحسب أكبر رقم في اللست دي. هقولك أول حاجة هنعملها: هنثبت أول رقم ونبدأ نقارنه مع اللي بعده، والناتج نقارنه مع الرقم اللي بعده، وهكذا لحد ما اللست تخلص.
يعني مثلًا اللست اللي عندي كانت كالتالي [1,5,3,8,5]:
- أول حاجة هعملها هي إني أقول إن أكبر عدد عندي هو الـ 1.
- ثم آخد الـ 1 ده وأقارنه باللي بعده اللي هو الـ 5 وألاقي إن الـ 5 أكبر.
- ثم آخد الـ 5 دي وأقارنها باللي بعدها اللي هي الـ 3، فألاقي الـ 5 أكبر، وهكذا لحد الـ 8.
هقولك تمام… اعمل الكلام ده بقى بالكود إزاي؟ هتقولي بسيطة:
- هعمل أول حاجة دالة بتاخد 2 parameters (لأني بتعامل مع رقمين دايمًا)، ثم الدالة دي جواها if condition: لو أول رقم هو الكبير خلاص رجّعه هو، ولو هو الصغير خلاص رجّع الرقم التاني.
- هقولك تمام، ثم؟ هتقولي هعمل لوب. هقولك فل جدًا، ولكن مش ناسي حاجة؟ محتاجين قبل اللوب نعرّف متغير ونخلي القيمة المبدئية بتاعته هي أول قيمة في اللست.
- هتقولي آاااه صح، عشان المتغير ده أصلًا اللي كل شوية هغير قيمته أما ألاقي رقم أكبر منه، وهو أصلًا الناتج النهائي اللي هطبعه.
متخيل إن كل ده بيحصل في الكواليس ومخفي عنك؟ طيب وأنا أعرفه ليه أصلًا؟ أنا ليا إن الكود شغال وتمام التمام. أقولك: لما أعرفه وأفهمه أقدر دلوقتي أعدل عليه وأعمله extend.
وبعد الـ max؟
المرة دي جبت الـ max. طيب إيه اللي هيحصل لو عاوز أجيب الـ min؟ اللغة موفرهالك. ولو عاوز أجيب الـ sum اللي هو مجموع الأرقام اللي في اللست؟ بردو اللغة موفرهالك. طاب يا عم، ما اللغة بنت حلال أهو!
طيب لو عاوز أجيب الـ product اللي هو يعني حاصل الضرب؟ ده بقى مش موجود. هتقولي خلاص، هعمله دالة، بدل ما كانت بتشيك أنهي رقم أكبر من التاني، هخليها تضرب الرقم الأول في الرقم التاني. هسقفلك بصراحة لأنك فهمت الحتة دي.
وإنت من نفسك هتلاقيك بتقولي: طيب اللي خلّى اللغة توفرلي كل الدوال اللي فاتت دي مش كانت عملت معايا الصح ووفرت عليا عمل اللوب وإني أعرف متغير وكل شوية أغير قيمته؟ هقولك: واللغة فعلًا سمعتك واستجابت.
اللغة عملتلك دالة بتعمل الكلام ده بالظبط، بتديها الفانكشن اللي فيها الشرط اللي عاوزه يتنفذ واللست بتاعتك، وهي بتعمل الباقي وبترجعلك القيمة اللي إنت عاوزها. الدالة الفخمة دي اسمها reduce، ولها أشكال كتير منها max, min, sum, all, any.
إزاي تستخدمها
كل اللي عليك إنك تعمله عشان تستخدمها إنك تخبط عليها من الموديول الجميل ده functools:
1
2
3
from functools import reduce
reduce(fun, iterable, initializer=None)
بتديها الدالة اللي إنت عاوز تستخدمها، كمثال مثلًا دالة الـ max:
1
reduce(lambda a, b: a if a > b else b, lst)
وطبعًا اللست بتاعتك.
فيه ملحوظة حلوة أوي: في default parameter اسمه initializer، وده فايدته إن مثلًا لو جيت تدي دالة reduce لست فاضية، ممكن تحط قيمة الـ initializer مثلًا بـ 0، وده هيروح للست بتاعتك ويحط الـ 0 ده في الإندكس رقم 0. يعني كأنك عملت insert للست بتاعتك عشان تتجنب إن اللغة تزعل وتديك Exception إن اللست فاضية.
الكود
[04-reduce_func.py](https://github.com/Ahmed-Soli/deep_dive_with_ahmed/blob/main/04-reduce_func.py)في الـ repo بتاع السلسلة.
![reduce(): [1, 5, 3, 8] goes through max(a, b) and becomes 8](/assets/images/posts/python-threads/reduce-cover.jpg)